Si Tyl at si Kai

by Mayor Jesse Robredo
Published in Abante, September 27, 2009

Magmula nang magsimula ang aming grupong Kaya Natin, ilang paaralan na rin ang aming napuntahan at libu-libo na ring mga kabataang Pilipino ang nakarinig ng aming mga kuwento tungkol sa maayos na pamamalakad at pagbabago. Gaya ng parating sinasabi ng aking kasamahang si Gov.

Grace Padaca ng Isabela, naniniwala rin ako na ang kabataan ay ang isa sa mga pinakamahalagang sektor ng ating lipunan na kailangan nating bigyang pansin kung nais nating humalal ng mga mabuti, matino at magagaling na lide­r sa nalalapit na eleksyon sa 2010.

Dalawa sa mga kabataang tumutulong sa amin sa Kaya Natin ay sina Cristyl Senajon at Kai Pastores. Kakatapos pa lamang nila sa kolehiyo nang magsimula silang tumulong sa amin sa pagsusulong ng aming mga adhikain. Si Cristyl o Tyl ay nagtapos bilang Valedictorian ng Ateneo de Davao University habang si Kai naman ay nagtapos na Cum Laude sa Ateneo De Manila University. Dahil nakatapos sila sa magagling na paaralan siguradong madali silang makakahanap ng trabahong magbibigay sa kanila ng mataas na sweldo ngunit pinili pa rin nilang maglingkod sa Ateneo School of Government at sa Kaya Natin.

Malaki talaga ang naitulong nilang dalawa sa pagsusulong ng aming kilusan na humihikayat sa bawat mamamayang Pilipino na humalal ng mga lider na isasantabi ang kanilang sariling interes at uunahin ang kapakanan ng nakakarami at mahihirap. Ipinakita nina Tyl at Kai na kahit sila ay bata pa, pwede na silang maging malaking bahagi ng pagbabagong minimithi nating lahat.

Sana tularan at maging mabuting halimbawa sila sa iba pang mga kabataang Pilipino na makilahok at makisangkot sa paghubog ng mabuting kinabukasan para sa ating bayan.

Kabataan din ang magiging susi sa kampan­ya nina Senador Noynoy Aquino at Senador Mar Roxas na ngayon ay tumatakbo sa plataporma ng tunay na reporma at pagbabago. Ngayon pa lamang marami akong mga kaibigan na nagsabing ang kanilang mga anak ay pumila ng ilang oras upang makapagrehistro dahil gusto nilang suportahan at iboto ang tambalang Aquino-Roxas. Ilang lider kabataan na rin sa mga malalaking paaralan sa iba’t ibang bahagi ng bansa ang nag-umpisa nang kuma­lap ng mga volunteer para sa kampanya nina Noynoy at Mar. Nakakatuwa na tila nabibigyan ng bagong pag-asa at lakas ang mga kabataan dahil na rin sa tambalang Aquino-Roxas.

Sa aking pagkakakilala sa dalawang ito, sigurado akong hindi nila bibiguin ang mga kabataang Pilipino tulad nina Tyl at Kai na nagnanais makakita ng bagong Pilipinas sa mga susunod na taon.